بين كلب ديفيد والمجلس ... احنا كشعب انبسطنا

السادات بطل البتنجان بتاعي لحد ما قريت نص معاهدة كلب ديفيد 1978 وإحنا منتصرين ومزهزهين  ونمضي على معاهدة 9 نقط لتطبيق اتفاقيات مع الأمم المتحدة ومجلس الامن بتنص على إن يبقي الوضع على ما هو علية مع إسرائيل ليه  

الوضع بقا سعتها

هما متسلحين وقواعد عسكرية وجوية على الحدود واحنا متشلحين وغيارتنا وسخة
  مصر ملهاش دعوة بغزة دي تبع فلسطين 
 انشاء حكم ذاتي لفلسطين 

 مصر تسيب اسرائيل تلعب في النووي وتلعب هيا في منخيرها زي رئيسها 
ميرجعوش فلوس البترول والموارد اللي نهبوها طول فترة احتلالهم لسينا

 ميرجعوش ايلات اللي هيا ام رشراش المصرية

 قناة السويس يعتبروها ذي قناتهم الهضمية بالضبط

مصر هتحسن علاقة إسرائيل بالدول العربية وتحقق استقرارهم في المنطقة

فتح باب للاقتصاد الإسرائيلي عن طريق مصر

حاضر هنبعتلكو خمره ونسوان و بلح الشام .....ونشطفكو و نفليكو و نخريكو ونحرسكو ...اه نقفلكو على الحدود  نهوهو او ننونو او نعمل عجين الفلاحة  

الشاعر معين بسيسو كتب قصيدة اسمها" المرتد" بيعلق على اتفاقية ذل وعار لشعب منتصر حكمه شوية بط بلدي بيقول

اركع للورقة

اغرس قلمك في عيني طفلك

واكتب ما أمرك ان تكتب

من ذبحك بالقلم عل عتبه بيتك

كوم أيامك قدامك

أوراقا واسأل لا تخجل

جلادك عن عود ثقاب

اعجن من وحل دخانك ، ورمادك

صفحات كتاب

السادات فرود الحرب ... طلع فارسلام او واقع تحت ضغط امريكي

والمجلس واقع تحت ضغط أمريكي برضه عشان كده

حقوق ضايعة

و لسه في قانون طواريء

 محاكمات عسكرية للناس

 شوارع تمرض

 تضخم اسعار

 تزوير وكدب

تعطيل انتاج

 اختفاء الشفافية

 عملينها مع  شرف

 محاكمات دباديب للي حاطط ايده في منخيرة

تصريحات مستفزة (وسعات مفيش) اصلا

مهما كانت الأسباب والأعذار والضغوط  البلد بلدنا

والشعب اولا...ومصر اولا ... والفقراء اولا

ويخربيت اسرائيل على امريكا على أي حد تاني ليه مصلحة وبيتمصلح

ربنا يدينا الفهم ويبعد عننا العند والغباء والتعنت والمحاكمات العسكرية والاجندات والضغط الامريكي ونسمع سلام تصحيح المسار
واللهي وانتي جاهي اللي يهاك البلوج والتعليقات يتسخط معزة
____________________
اللي يفرح بقا ان احنا خرجنا 9000 معتقل امن دولة ودخلنا بدلهم 12000 معتقل احكام عسكرية .....  وقال هيسخطوك يا قرد    

يا ريس خد الباب في ايدك

 بعد عشرين يوم طوب وميه وسخة وحصنة وجمال وودبابات ومدافع وعربيات ورصاص وقنابل وبنادق ورشاشات وقناصه ومتفجرات ومعتقلات وممثلات ورقاصات وفضائيات ومخيمات ولعب وحجات ملخص اليومين اللي فاتو

ثورة ثورة مفيش رجوع .... ضد الفقر وضد الجوع
ثورة ثورة يا شباب .... على الحاكم الكداب
ارفع صوتك زى الناس.. إحنا كرهنا الظلم خلاص
طب محدود الدخل يموت...ولا ينادى بعلو الصوت
على وعلى وعلى الصوت.....اللى هيهتف مش هيموت
مش هنخاف مش هنطاطي .. إحنا كرهنا الصوت الواطي
ياجمال قل لابوك ... شعب مصر بيكرهوك
يلي فاضلك 6 شهور.. خد أجرتهم يلا وغور
ربعميت مليار جنية ...دم الشعب حرام عليه
اه يا مبارك يا طيار.. جبت منين 70 مليار
لا يا مبارك يا مفلسنا ...انت بتعمل ايه بفلوسنا
ابن علي بيناديك ... فندق جده مستنيك
هوا مبارك عايز ايه... كيلو اللحمة بميت جنية
هو مبارك عايز ايه ... عايز الشعب يبوس رجليه
لا يا مبارك مش حنبوس بكره الشعب عليك حيدوس
ارفع ارفع في الأسعار بكره الدنيا تولع نار
الإصلاح بقي شيء مطلوب قبل الشعب ما يأكل طوب
ارحل ارحل يعني امشي ...يمكن هوا ما بيفهمشي
يا سوزان خافى عليه... هنجبهولك من رجليه
يا سوزان قولي للبيه ... ربع قرن كفايه عليه
شيلوا مبارك حطوا خروف ... يمكن يحكم بالمعروف
دلعو يا دلعو.... مبارك شعبوا خلعوا
يا مبارك قول لابنك ... لما تشوف حلمة ودنك
غلي السكر غلي الزيت... بكره نبيع عفش البيت
يا مبارك يا خسيس ....دم المصرى مش رخيص
هما بيكلوا فراخ وكباب ..واحنا عيشتنا هباب فى هباب
عشرة مليون عاطل .. نظامك يا مبارك باطل
أه بنقولها وبالملايين .... ارحل ارحل مش خايفين
مش عوزينك مش عاوزينك.. دم الشهداء بينا وبينك
قولوا لبنوك سويسرا ...عايزين فلوسنا
يا حواس يا كلب القصر ..ياللي مهرب اثار مصر

قولو لمبارك توت توت.. رجع لينا تماثيل توت

يا برادعي يا عميل... تحكم مصر ده مستحيل
شعب حضارة ومجد سنين...مش هيطاطى ليوم الدين
اعتصام اعتصام.... حتى يرحل النظام
متعبناش متعبناش.. الحرية مش ببلاش
قالو علينا شباب كنتاكي ... واحنا يا مصر خرجنا فداكي
اللي بيضرب اهله وناسه.. يبقي عميل من ساسه لراسه
حضرات السادة الضباط ...بإديكم كم واحد مات
يا أبو دبورة ونسر وكاب.. إحنا إخواتك مش إرهاب
اشهد اشهد يا زمان ... ان المصري مش جبان
مش بنخاف من الداخلية .. مصر بلدنا وغالية عليا
حط محمد جنب حنا .... والله لترجع تاني جنة

القصد

أنا بقول يعني لو مبارك كان ضربنا إحنا الضربة الجوية، وراح حكم إسرائيل 30 سنة، كان زمانهم بيشحتوا دلوقتي

يا نظيف بيه كنت فاضحنا بالحكومة الالكترونيه اديك اتفضحت الكترونيا

الجنزوري بما ان توشكا خطاء والخصخصة خطاء وعيشتك كلها كانت في الخطيئة صلح غلطتك ونقطنا بسكاتك

الجنرال شفيق  ادام شايف وزارة التخطيط ملهاش لزمة فانا باقترح استبدالها بوزارة شم على ضهر ايدك على ان يقوم بادارتها عدد من المنجمين وضريبة الودع وفتحين الفناجين وقريه الكف لرسم مستقبل شعب مصر على ان يراسها معالي الوزير بشندي طرمخ تكنوقراط 

اليوم

العاهل السعودي يامر ببناء مجمع سكني للرؤساء السابقين وعائلاتهم

اسماك القرش تعتصم في شرم الشيخ وتطالب بعض الرئيس

مبارك يهدد باحراق نفسة ويطالب برحيل الشعب

الشيطان يعتصم في ميدان التحرير ويوكد انه كان يمتثل لقرارات النظام

اضافة عقوبة لقانون العقوبات تسمى"عقوبة الضرب بالجزمه القديمة" ؟

----------------------------

اخيراً:نرجو من كل المصريين الدعاء لمبارك عشان عنده انترفيو في موبينيل

كان معكم صاحبة المدونة والقلم والكرامة جديدة دي  بلحظات من بعد اسقاط النظام والحكم والوزارة والاجندة والبلوفر والفلول والجمال وبدل رقص امن الدولة ولولولوليي شيالله يا حكومه

بسم الله الرحمن الرحيم.... الاجابة تونس

بقا سلامة في خير.. و خير في ايه ؟؟ سلامة
الواحد راجع من تونس  هيتشل مطرح ماهو قاعد (اه يا ناري ) الواد بو عزيزي اسم النبي حارسوه وصاينوه ولع في نفسه عشان قلم يتيم لطشتهولو واحده ست وسط خناقة في القسم على حته عربية كاروه؟راح تاني يوم على طول مديها حريقة خبط لذق كدا؟ .. مقدمش تظلم؟ ملفش كعب دايرفي المحاكم؟ مرحش المديرية ؟ مجريش ورا اعضاء مجلس الشعب؟معملش بلوج وقعد يعدد؟ لاء انجز وهات مالاخر برافو عليك يا حمادة واخص عليها الوحشة دي بكره الرئيس الديمقراطي يضربهالك أه أه

يا جدعان تونس قبل الثورة

نسبة الأمية فيها صفر

نسبة المرض فيها صفر

نسبة الفقر فيها صفر

متوسط دخل الفرد فيها 11,000 دولار

بتدفع معونات شهرية للعاطلين عن العمل

الشباب بتجوزهم و بتديهم فلوس

إسكان الشباب عندهم فلل في ارقي إحياء المدن الأساسية

العلاج هناك مجاني

السكن مجاني

مفيش ولا ضرايب ولا دمغات ولا مصاريف اداريه ولا مخلفات مرور ولاكل سنة وانت طيب وحاجة بسيطة كدا عشان الامور تمشي بسرعة .. اه يا نارييييييييييي

حاش لله لتفتكرونا بنحسد احنا بننق بس ... بيوتيفل فري فري بيوتيفول .. عيني هتطلع عليهم

التوانسه عايزين ايه تاني من الحكومة؟؟ خمره ونسوان طب والنبي ومن نبا النبي موجودين
الواد ده ولع في نفسه ليه ؟؟؟ يا تري معندهوش فيس بوك؟ ولا معدنهوش بنطلون استرتش كحلي؟ ولا معندهوش حزب تجمع؟ ولا كان بياكل شيتوس بالجبنة المشطشطة

لو عرفت الاجابه اولع ولو معرفتش  تبقا مصري وهنا هتولع برضوة
واللي هيقولي بسم الله الرحمن الرحيم.... الاجابة تونس

هقولو غلط وستين غلط .... متحطش حمارتك جنب حماره العمدة
أنت فين وهما فين .

طب وحياه مهند اللي مابحلف بحياته كدب لو ولعوتوه في التمنين مليون بجاز ..... بردو الاهلي هياخد الدوري... وبردو شيكابالا احسن لعيب في تاريخ الزمالك ... وبردو البلوج هيفضل متراقب جاعنين عريانين عيانين مترقبين كجلمود صخر حطه السيل منعلي .... وبالمنسبه دي نحب نهني على على وصوله للدور التمنية في طابور العيش ونتمنى له سرعة الوصول للتصفيات

جوز الضراير غندور و لو كان له بربور

واحد متجوز أربعة ... لبنانية وسورية وامريكية ومصرية

هنفترض ان المصرية هاتسيبو يعيش .. قام يصلي الفجر
سمع خروشة في الصالون... راح يشوف في ايه.. لقي الأمريكانية على جهاز الرياضة
قاللها ايه مصحيكي بدري؟
my dearقالتلو لازم احافظ على رشاقتي ولياقتي وأعمل إيروبكس
سمع خروشة في المطبخ .. راح يشوف في ايه... لقي السورية شغالة بتعمل فطار
قاللها ايه مصحيكي بدري؟
قالتلو ... إبن عمي... تئبرني اشتهيتلك هالكم حبة كبة وصحن هالتبولة... ما هاين علي تطلع على ريء بطنكقام سمع خروشة في قوضة النوم... راح يشوف في ايه ... لقي اللبنانية قدام المراية بتزبط وشها
قاللها ايه مصحيكي بدري؟
قالتلو.. حياتي عم جهز حالي لإلك ..عشان تصطبح بأحلى وش... بس تخلص صلاة ناطرتك يا روحي

قام سمع خروشة في الطرئة راح يشوف في ايه
لقي المصرية ناكشة شعرها وبتتمطع ولابسة جلابية كستور
قاللها ايه مصحيكي بدري؟
قالتلو أنا رايحة الحمام وراجعة وانت مال امك

------------------------------

خبر في فخشميت جرنان بيقلك المصريات اكثر نساء العالم ضربا لازواجهم

اللي كتب الخبر ده شخصيه يا واخدة بالشبشب يا هياخد بالشبشب 
وانا من موقعي هذا قدام اللاب توب المشحوت احب اقلو هوا في حد بيستحمل الراجل المصري غيرنا ؟

يبقا بوذة شبرين وكرشة مدلدل مترين هيسلم بيه على الناس وبطه بلدي  

وطول ما هو قاعد يقلك يا سلاااام على هيفا ونانسي وروبي

بوس ايديك وش وضهر ان في مخلوقة بصت في خلقتك الي تقطع الخميرة مالبيت كمان نانسي وهيفا الرجاله بتديهم فلوس اد كدا عشان يعملوعمليات بمالاين وشكلهم في الاخر يبقا كدا ودي متجوزة مليونير ودي متجوزة مليونير وانت حيلتك ايه غير دعوة امك ليك هوا متوسط دخل الراجل المصري كام؟ اقلوكو انا

 الاحصائيات بتقلك ميه ملطوش اسماله علي مقامكم يعني احنا بنتجوز جاعنين شحاتين عريانين ... اياونبي ياختي زي مابقلك كدا اهيئ اهئ اهئ

يا كبد امها المصريه بتصحا مالنجمه وتصحي العيال  وتدخلهم الحمام وتحضر الفطار وتلبسوه وتلبس وتلبس المقاريض الهدمة وتدئلج في المواصلات وتروح يتمسح بكرامتها الارض في الشغل وتدئلج في المواصلات تاني وترجع تطبخ وتحمي وتلبس وتغسل وتوضب وتنضف وتكنس وتذاكر للعيال وتجري ورا ده وتزعق لده وتسمعلوه وتبسطوه وتحايلوه ومرتبها كله ومرتب اهلها يتصرف عليه وعلى عياله وهوا يكنز ويحوش من وراهم كانه عايش في جمهورية نفسه وبس .. ويرجع من شغله ينام ويصحا يعمل ايه ؟؟؟يا ينزل يا يتفرج على التلفزيون اصل في ماتش وهوا اسماله يعني ابوك الل كان بيلعب

ولا اللي قعدت في البيت واشتغلت خدامه خصوصي لجنابة ولعياله عشان تبسطه وترضيه ...ولا بقا ليها مستقبل ولا قيمة في سوق العمل .. عشان مفيش خبرة الا في شغل البيوت .. يوم ما ربنا يفرجها عليه ميعوضش على الشهيدة الصابرة اللي احولت وشابت من عيالو وطلباتو وشغل البيت

لااااا يعايرها ويرميها في الشارع رمية الكلاب البلدي ويدور على غندورة لسه بصحتها ولو عاتبت عليه يرد باشهر كلمة فيكي يا مصر انا راجل

  انت كدا بقيت رشا وميتردش عليكى بالكلام

----------------------------------------------

واحب اذكر بالمناسبه السعيدة دي حوار دار داخل مطار القاهرة الدولي بيني وبين مزز لبنانيات

ميمو: على فكرة الرجاله المصريين بيحبو اللبنانيات قوي

لبنانية:يئبرهم هالزلاما

ميمو: ليه يا بنتي ده الرجاله المصريين كويسن جدا

اللبنانية: شو هالحكي الزلمة المصري كذاب واناني وبخيل وخاين ومافيه يدلع مرته

ميمو:اه صح يا اختي مافيه يدلع مرته ..ميرسي ليكي كتير

لووووووووولللللللولي ينصر دينك ....تسلملي عيون هالصبايا....شوفي خيتي ليك وحياتك امنتك امانه بدي لما تفوتي علبنان تبوسلنا زلمات لبنان كتير وتسوي حالهم يدعو لالله يصبرنا على ما بلانا

أعمى يقول لأعمى سنة سودة اللى تجمعنا

يجعلها بيضا عالكريم سودا عالئيم منيله بستين نيلة علينكد عالحريم
القصد محاولات مستميتة لاحداث تغيرات في حياتنا.. اهلاينا .. أخواتنا .. جيرانا زمايلنا ... يخدمونا يجوزنونا يسفرونا يموتونا يطفشونا ... اهو أي تغيير والسلام كلها في الاخر ودتنا لنتيجة واحدة الا وهي ان عمل مهما عمل متعوس وخايب الامل اللي بعده

حوار مع واحدة ست معرفهاش اتصلت بيها غلط

ميمو: الوووووو بنك مصر

الووو لا والله يا بنتي مش بنك مصر بس يسمع من بقك ربنا

ميمو: بس النمرة دي متسجلة في السنترال باسم بنك مصر

اه يا بنتي ما انا عارفة مالناس بتكلم على طول تسال على البنك

ميمو:طب ما تروحي السنترال تغيريها يا حجة

ونبي يا بنتي ما فيا صحا اقف والعيال اتجوزو وسابوني وحديا

ميمو: تحبي يا حجة اكلمك السنترال انا اخليهم يغيرولك النمرة

اخرسي يا بنت الكلاب..... سيبي الناس تسال عليا يا حئودة

حوار مع واحد كنت ناوية اتجوزه

وبعدين اكتشفت انه اله النكد عند قدماء المصريين

هوا ان لما بكلمك مبترديش لية ؟؟ مستهيفاني؟ مش مالي عينك؟ مش راجل قدامك؟
ميمو : معرفش.. لو عشت لحد الفرح هعرف
مش انا قلتلك لما تروحي تكلميني ؟ ولما ابصلك تبصيلي؟ وما تقميش الا لما تستازنيني
ميمو: حاضر
اية حاضر دي ما انتي عالطول بتقولي حاضر ومبتعمليش حاجة مبخدش منك الا حاضر
ميمو : خلاص هاعمل
احنا نتجوز دلوقت وابقا اغيرك براحتي بعدين
ميمو : انت عايز حد يغيرلك ؟
ممكن تردي علياااااااااااميمو:صحيح اقطع راس الكلب وارميها واللى النكد فيه خصلة ما يخليها
مش فاهم قصدك
ميمو: بص روح لمامتك قلها جاب الغراب لامه خراه فكمه .. اطلع بره ياله انا ناقصاكو يا ولادالكئيبة


ترتب على الحوار ده ان لامؤخذة داخلين عالتالتين اهو اسماله على مقامكو وبنتحول تدريجيا لنبتة السراخس السعفية المعروف عنها نجاحها الباهر في تكاثرها الذاتي وفشلها الدائم في تكوين أي علاقة مع النباتات المحيطة وقال مالك يا بخت من دون البخوت لبخت

حوار مع الواد كريم قدام باب شقتنا

ميمو: يا كريم يا حبيبي اللعب بالكورة بعيد عن شقتنا عشان مش عارفين ننام
كريم: اففف يا ابله يوه بقا بابا بيقول انك هتفضلي ساكنة في الشقة اللي جنبينا لحد اما حد يتجوزك
ميمو: شوف يا كبد امك .. الحكاية ان جدك الله يرحمو .. ربنا رزقو بحمار .. اللي هوا ابوك  وبعدين فضل محتاس بيه .. محتاس بيه .. لحد ما لقاله معزة .. رضيت تاخده اللي هيا امك  .. قام رابط المعزة جنب الحمار وقال ان ما اتعلمت شهيقة تتعلم نهيقة
كريم: مش فاهم يعني اية يا ابله ؟؟ قصدك ان بابا حمار ؟؟؟
ميمو: اسماله عليك ... يا اختي بطة حلوة..أمسك يا حبيبي الجزرة دي حطها في ودن الحماااااااار

ستك ستارز

حيث ان المجتمع مليئ بالدراما الاسرية والماسي المادية المتمثلة في انعدام الموارد والنزاع على ما تبقي من معنويات ....مش فاهمة حاجة من الكلام المنيل اللي بقولو ..بس القصد يعني رجعتلكو اقوا مالاول وهقرفكو هاقرفكو

احنا اتعلمنا اية ؟ ايوة ..منفتحش باب الشقة عشان مبيجيش من وراه الا المصايب والبواب عايز فلوس ودفع العداد وبتاع الزباله واحنا اخر الشهر ومش طالباها نبيع الهدمة اللي فاضللنا مالحكومة اسمع

شوشو: طاخ طاخ....افتحي يا مها انا عارفة انك جوة .....طاخ طاخ طاخ ..افتحي والله هاكسر باب الشقة

ميمو : اشتاتا اشتوت ......انصرف

و فتح الباب كمداُ وقهراً ودي ناطت في وشي

شوشو: يالا بينا يالا يالا يالا يالا بينا يالا نروح لستي ستارز

ميمو :انتي هاتصتعبتشي ستك اسمها ناعسة والله يرحمها خرجت من طابور العيش ماتت في طابور المعاش

شوشو: يا متخلفة دا مكان هاي قوي الناس الكلاس بيشترو منه حجات

ميمو: اديكي قلتيها كلمة ....احنا بقا نروح نهبب اية

شوشو: افضلي انتشي كدا كسري في مجاديفي واحبيطشينا يالا انزلي قدامي

وسلمت امري الي الله وانا جيبي مفيهوش الا عشرة جنية عامية كنت هاجيب بيها سندوشتات لمده اسبوع  ونزلت معاها لحد ما وصلنا مدينة نصر ودخلنا اسماله على مقامكو حتة كدا نور في نور وماليانا ايس كريم وملبس .....احم لا مش طاقة القدر دة ستك ستارز.....دخلتنا محل لا ينطق اسمه ولم انجح حتي الان في نطقة اسمه القصد

شوشو: الله المحل دة في حجات جميلة قوي تعالي

ميمو : دة شكلة غالي طحن

شوشو:يووووووووووه اسمعي الكلام .... تعالي

نقت شوشو بلوزة لونها فوشخقي فاتح ....مكتوب عليها 1200جنية وتمسكت بيها تمسك العقربة المخصبة بذكرها في موسم التزاوج

مدير المحل :الحساب 1200 جنية

شوشو: مش هادفع اكتر من مية بس

مدير المحل :دة السعر من المصنع يا هانم البلوزة سعرها كدا

شوشو: واللهي ما دفعة ولا مليم زيادة دانا شايفاها في الشواربي باربعين جنية

وحطت البلوزة في شنطتها واتجهت الي الباب في خطوة سريعة وهنا صرخ مدير المحل

مدير المحل : انتي يا هانم رايحة فين ....ساكيورتشيييييييييييييييييييييي وداس على زرار

ثواني و انفتح باب المحل ووراه 8 عواميد نور بعصيان..... لاء ... لسة شوية
ننزل ببوز امينه رزق وشحتفة نادية الجندي وعياط شاديه ونخرج علبه الفلورا  

ميمو : يا ناس..... الراجل ده عايز يضرب الست دي  .... وانا شفت المنظر انهرت ومخلصنيش واحده ست تضرب قدام عنيا  فقلت انده عالامن ينجدوها  
الامن :هوا حضرتك المسئوله هنا
ميمو :  مسئوله عن حقها يا اخويا ربنا ما يبهدلك وليه
الامن :حقها يا هانم ...حسبي الله ونعم الوكيل فية حد يضرب واحده ست زي القمر زي دي  معلش يا مدام حقك علينا احنا هانروقهولك لحد ما يجي لحد عندك ويعتذرلك
ميمو: لولولولولييييييييي..منصورة يا اختشي منصورة

ربنا يديكو الصحة يا رجالة ....البركة بالشباب...  احنا هنستنا بره لحد ما تقنعوه بالاعتذار
وخدتها في ايدي و طيران على الاسنسير

ميمو: دي عاملة تعمليها فينا ..اللي ممعهوش ميلزمهوش

شوشو: امال لو عرفو ان انا خدت التيير والجيبة دول كانو عملو فينا اية

ميمو: يالهويييييييييييييييييييييييييييييييي

بيت الحزين معلم بالطين

غيبة وخيبة وفر وكر وادينا متنيلين متقندلين راجعين كاتبين حامدين لربنا على سلامتنا وشاكرين ...... اللي بعده

بقا اسمالله على مقامكو المرتب زاد سبعتاشر جنية وتلاتين قرش واربعة مليم .. كلمة ..القصد.... الحداية بتحدف كتاكيت يا جدعان والمصلحة اتقلبت ... طيب نعمل بيهم اية فأم البلوج المتراقب ده ...اقترحو

اولا : نفك كوشتتة اتوبيس مية اتنين وخمسين عتبة ونضرب بيها غطس فالمريوطيه
ثانيا : نفصل جلد كراسي مية اتنين وخمسين عتبة شورطات اسكرتش لزوم دخول التصييف

ثالثا : نشتري نادي الزمالك .... ونبيع اللعيبة فرط ... بعد ما نحط صورة عبواحد السيد على فنلات النادي ونكتب تحتيها راحت تاخد بتار ابوها رجعتلنا حبله
رابعا : نزيع حلقات مهند ونور لاجل ما نثبت انها عورة وابوها عبد ودخلتها يوم الحد ونمرودة ونكدية وبنت كلب وعايزة الحرق
خامسا : نصدر حشيش لاسرائيل ... بدل الغاز الطبيعي يمكن نعدل المايلة .. وخاليها تضرب مخدرات بدل ما تضرب غازات
سادسا: نجيب بالتلاتين قرش حديد ... يمكن يشح وخلي الراجل يستفتح والغلابة تاكل والشباب تسكن ... ويتربا فعزو حديد عزو
سابعا: نشتري شقق حداشر متر فالتجمع واكتوبر فيها ملاعب وولف , فسين , مدارس انفرمشونال ومطاعم سي فول
واخيرا: نجيب جلاليب من كرداسة وشباشب زيكو من باب النزاهة والوجاهة وكيد العوازل يا لمونة واستبدالا للجلاليب الكستور والقباقيب منزوعة الوش
ينعل ابو القرش الي ما يمتعش صاحبو

ويا بيت الحزين يا معلم بالطين يا انا.... ياانا .. وفي حارة القرع يا بخت من مات وفي راسة قملة .... وولاد الحرام ماسبوش لولاد الحلال حاجة يا ابو النضافة ياحمد

جمهورية وسخونيا

راجعين من ماتش الأهلي والزمالك بزفة  عشان اترزعنا في مدرجات نادي الزمالك واحنا لابسين احمر- ما التذاكر هناك ارخص ومبتخلصشي والباب بتاع مدرجات الزمالك مفتوح والمدرجات فاضية رافعين رايات النصر والعيال أية وشها مورد وباين عليهم اللقمة والحياة بقت حمرا ومروحين بالطبل والزغاريط والزفة كالعادة إنبي لوهولمان نفسة اللي كان بيحكم الماتش كانو اتغلبو برضه

يعني وأول ما ندخل المنطقة نسمع الراديو بيقلك

الحكم ببرائة ابن الوسخة من قضية العبارة بنت ...عشان القاضي  خايف يتئذي من ولاد ... في البلد اللي فيها الفساد بقا على عينك يا تاجر يا ابن الايه .. اسماله عليكو

واذكر بمناسبة الحديث ابن الوسخة ده جلسة مجلس الشعب الموقر لما قام الأخ خالد الذكرعزمي وقالك : يا جماعة المذكور ده صاحبيييييييييي وحبيبي ومستحيل يعمل حاجة بنت وسخة ذي دي والقضاء هيثبت صحة الكلام الوسخ اللي بقولو
واذكر برضة ان وحيد حامد من سنتين قال: انا هعمل فيلم يبين الحادثة  دي ومنعة محامي ولاد الوسخة  وقالة: موكلي هيطلع براءة براءة يا روح خالتك انت متعرفش هوا شريك مين

الشعب :امال الغلط دة.... مين المسئول عنه ؟؟
القاضي : المسئول عنة ام سحلول عشان كانت بترضع سحلول وسابت الناس تغرق ؟؟؟
الشعب :و ام سحلول هتسيب الواد وتروح العبارة ليه ؟
القاضي : عشان شافتها وهي بتغرق المفروض ترمي سحلول وتنط تنقذها
الشعب : وهي مال أهلها بالعبارة دي . مالمسئول هوا اللي ماصلحهاش؟
القاضي: ما هوا مكنش عايز يصرف على العبارة
الشعب :آمال كان بيودي فلوس الناس والتذاكر دي فين؟
القاضي : كان بيشرب ويلعب ويتفسح مع صاحبة وحبيبة وشريكة في عزبت ابوهم ..انتو هاتقرفوني ليه ؟ أما شعب ابن وسخة صحيح

أنا شمتان في الحج ممدوح عباس بعد إن اثبت فشلة في إدارة نادي عريق ذي نادي الزمالك
وشمتان في أحمد النجار بعد إن اثبت فساد القضاء والقضاة في ظل الكوسة الإدارية للدولة
وشمتان في محمد حمودة محامي الشركة بعد ما الناس كلها دعت علية في ظل طرمختة على موكلة
وشمتان عشان صاحب العبارة كان عضو في مجلس الشورى والحزب الوطني ولجنة السياسات والامانة العامة بقرار شخصي من رئيس جمهورية وساخونيا

---------------------------

اقر انا المدون باصابتي بالتخلف العقلي والفصام والجنون والجزام واعفو نفسي باي شكل من الاشكال من تحمل اي مسئولية او مسائلة قانونية واعتذر لوجود الفاظ بذيئة خرجت عن ارادتي تحت تاثير الصدمة واني عيل عيل عيل وستين عيل

ينعل ابونا احنا بقا

في عيادة دكتور السنان ملطوعة مستنية دوري ووقعت عيني على مجلة اجتماعية صارخة خليعة مثيرة ماجنة كافرة فاسقة فاسدة تدعى فلاش لاحسن تفتكرو اني اتلحست في نافوخي ودفعت فلوس في مجلة زي دي ياييي .....كل المجله عبارة عن الأتي
في حفل عائلي بهيج

احتفل معالي الوزير فلان الفلاني علي زفاف نجله إلي نجلة رجل الإعمال المعروف ترتان الترتاني

وأقيم الحفل في فندق مية نجمة وقمرين وامتد الحفل إلي الساعات الأولي من الصباح الباكر واحييا الحفل نخبة من نجوم الفن – دينا وعمرو دياب وهشام عباس وشاكيرا وارتدت العروس فستان زفاف صمم خصيصا لها من مصمم أزياء فرنسي مشهور بفخشوميت ألف دولار واشرف على ماكياج العروس وتسريحة الشعر مصمم الشعر الايطالي واشرف على تصميم قاعة الحفل فريق عالمي متخصص وقد ملأت الزهور النادرة قاعة الحفل وتم نقل البوفيه بالطائرة من فندق الريتز بباريس مباشرة إلي قاعة الحفل ثم سافر العروسان لقضاء شهر العسل في افخم فنادق أوروبا وامريكا ..الناس دي مش من هناا ولا اية ؟؟؟ايشي خيال يا ناس ؟؟؟

طيب إحنا كشعب لما نعوذ نعمل مجلة اجتماعية نكتب فيها عن أفراحنا كأغلبية !! نكتب نقول فيها اية
في حفل عائلي بهيج برضوه

احتفل ابن خالة جوز اخت جار عسكري مرور ارض اللوا بزفاف ابن مراته على كريمة الحج شفيق صاحب كشك السجاير المعروف

واقيم الحفل في نادي شباب عزبة ابو تفة وأحيا الحفل نخبة من الموهوبين والعجزة وكبار السن – شفيقة الدلالة وأبوعادل العربجي وعبد النعيم بتاع الدش وقد ارتدت العروس فستان اخضر عشان ملقتش فستان ابيض عند محل الإيجار ثم تم توزيع سندوتشات جبنه بقوطة وجبنه بخيار وجبنه من غير قوطة وجبنه من غير خيار وأرواح ومشابك غسيل ثم أستقل العروسان مترو الإنفاق لقضاء شهر العسل عند خالت العروسة في شبرا----------------------
ده على افتراض اننا لاقيين نتجوز ومعانا قرشين بنعرف نعمل بيهم أفراح

وزارة الملابس الداخلية

الجمعة بقا وقاعدة فوق سطوح بتنا على الكرسي البلاستك الهلال والنجمة ولابسا الجلابية الكستور الملوكي والشبشب ابو صباع والعز باين عليا قوم اية اسمع جرس التليفون

أمي:يااا ماااااااااهااااااااا واحده صاحبتك عايزاكي عتليفون

ميمو:وانا ايش عرفني انها صاحبتي ..ادتك امارة ؟؟

امي:انتي هاتنزلي تردي عالبنت ولا اقفل السكة في وشها ؟

ميمو:اقفلي...ولااقلك لاحسن تطب عليا اناااا نازلة

ريهام: الو بقلك يا مها تعالولي 6اكتوبر ضروري..أصل الفستان الي هاروح بية فرح لبني باظ

ميمو: متروحيش الفرح احسن
ريهام :مها ..هاتي البنات وتعالولي حالا

توالت التليفونات انقاذا للموقف واتفقنا نتقابل في ميدان لبنان و نروح كلنا بعربية واحدة ...واخدين المحور

والفرحة مالية عنينا وداخلين على الحتة الديقة الي قسموها رايح وجاي عشان يقهرونا نفسيا وفضلنا واقفين فيها لحد ما روحنا طلعت وافوجئء باية ؟...ظابط وامن وهيصة كبيرةمستنية العربية

الباشا: انزلي وهاتي رخصك
ميمو: لية يا بية بس يعني كل الهيصة دي عشان رخصي ده كتير عليا كدة واللهي يا فندم وبعدين سعدتك انا رابطة الحزام وماشية على 30 سعادتك وملوش لازمة الاهانه سعدتك داحنا بنحب مصر سعادتك

الباشا:احجز اللي بترد دي ينعل ابو .. يا ولاد ال ... وهات اللي معاها ..ابقي ردي براحتك في القسم يا..احم ولا بلاش
ميادة : هما واخدينا على فين يا ميمو
ميمو: يعني ظباط ومجرجرينا علبوكس تفتكري هيودينا فين!!الحديقة الدولية

ميادة:يا فندم مايصحش كدة.. ممكن نحل الموضوع بهدوء

هنا غوريلا في ايدها عصاية مسكتني وسحبتني لحد الباشا الظابط

ميمو:الله يخربيتك يا ميادة والبيت اللي جنب بيتك

الباشا :انتي جاية 6 أكتوبر لية يا روح خالتك؟ ومين اللي قالك تيجي؟ ..رايحة القرية الزكية ؟؟

ميمو: واللهي العظيم يا باشا انا ما رضيت اروح القرية الفرعونية مع عيال الجيران سعدتك وماليش فالخروج نهائي سعدتك ...انا واللهي هاقول على كل حاجة سعدتك ومش هاخبي اي حاجة عالحكومة .. هيا منها لله لبني انا قلتلها متتجوزش اليومين دول ....ما سمعتشي كلامي ....شوف يا بية ريهام كلمتني عشان الفستان الي عملتهولها ام عماد الخياطة طلع ضيق شوية وماسك من عند الوسط .... انا قلتلها يا ريهام اللبسي الفستان كدة جميل والله مسمعتش كلامي واشترت نص متر كريب جورجيت.. وصممت توسع الفستان

وقالت لمو عماد: هاتوسعيلي الفستان يعني هاتوسعيلي الفستان ..

رديت عليها امو عماد وقالتلها : انا مش فاضية وهاتستلموه كدة واضربو دمغاكو في الحيط .

.سعتها بقا ام عماد كانت لسة مبيضة الشقة ..فريهام ملقتش حتة تضرب دمغها فيها ...وفنفس الوقت شيماء عاملة فستنها عند ام عماد برضو..... قوم لما عرفت راحت شخطط في الولية ....قامت الولية اتخضت وطردتنا مالبيت ...قمنا واخدين الفساتين وطلعنا على الترزي الرجالي الي في اخر الشارع وادنالة الكريب جورجيت عشان يوسع الفستان طلع التزري دة جوز ام عماد قام سالنا...... انتو مين اللي عملكو الفساتين دي ...رديت علية شيماء وقالتلوة : الولية المجنونة اللي في اول الشارع ...سعتها بقا ريهام بصت لقيت صورة فرح الترزي على امو عماد في الصالة.. راحت ماسكة الترزي مواقعاه عالارض ..وميادة كانت واكله سندوتش مؤمن ... قامت مرجعة علي الترزي... قام الترزي مسك المقص وبوظ الفستان

بس .. هي دي كل الحكاية سعادتك .. وأنا والله العظيم بريئه

الغوريلا: يا باشا مش دي العربية المطلوبة دي عربية بنفس مواصفات العربية اللي عايزينها

بدور وشي لقيت العساكر موقفين عربية نفس نوع عربيتنا ونفس اللون وارقمها قريبة جدا بس راكب فيها شباب بدقون

الغوريلا:هيا دي العربية المطلوبة والارقام مطابقة
ميمو: هما دول العيال اللي حضراتكم كنتم مستنينهم
الغوريلا :ايوه امشو انتو خلاص كدة
ميمو : خلاص اية يا باشا!!! داحنا دمنا نشف وركبنا سابت وهنرجع تاني للبمبرز سعدتك .سيادتك كمل مج النسكافية بتاعك وسبلي ولاد الهرمة دول ..محدش يحشنااا.... عاااااااا تركبو عربية زي عربيتنا لية يا كلاااااااااااب مش كفاية الفستان طلع ديق عالبت

المادية الواطية

في يوم من هذا الشتاء القارص( البارد بس بتفزلك) اتعزمت على سبوع بنت دعاء صاحبتي وده واجب والبت مجملاني وخيرها على الي جابوني والي خالفوني فلازم احس على دمي يعني واباركلها ورحت . بعدين ماسكة انا بقا صينية الملبس والشيكولاته امو 40 جنية الكيلو وقاعده احف اقوم افوجوء بشاب غريب كدا بيبصلي في صينية الملبس يا رب مازورش والله ولااااا فتفوتة انا الي شفت الصنية الاول تبقا من نصيبي

الواد: مساء الخير انا محمود اخو دعاء وابقا خال النونو
ميمو :وفيها ايه يعني ......انا مها والملبس ده بتاعي
محمود :انا شفتك كتير مع دعاء وبصراحة هي بتشكر في اخلاقك قوي

تسبيل بقا ومسح ادينا من لغوصة الشوكلاته وتنشيف البرابير وازاله فورية للعماص واي اثر للمزاكرة والاجهاد وسرسعة صوت

ميمو: ميرسي واللهى الناس كلها بيشكرو فيا على طول كدا..احم
محمود:بصي يا مها انا صريح ومبحبش اللف ولا الدوران...... انا بفضل الله محاسب ومرتبي 600جنية وعايز ارتبط بيكي رسمي بس معلش افضل انك تقعدي في البيت

صمت رهيب وتتنيح وغيبوبة مؤقتة جت بعديها لحظة عدم استيعاب..احمدك يا رب واحد ربنا اعمي بصريتوه وامه داعية علية

ميمو : انت عايز تتجوزني انا ؟؟ تكتب اقرار بكدا؟؟ قصدي يعني دة شرف ليا يا استاذ محمود بيه بس اديني فرصة افكر احم خلاص فكرت وموافقة
محمود : خلاص يعني انتي موافقة على قعادك في البيت دة شرطي الاساسي؟؟

مش عارفة لية جت على بالي تصريحات وزارة التجارة والتنمية المحلية بخصوص الاسعار الجديدة

كيلو اللحمة 40 جنيه

الفرخة 25 جنيه
قزازة الزيت 9 جنيه
قزازة الخل 7 جنيه
علبة السمنة 46 جنيه
كيلو العدس 6 جنيه
كيلو الفول 5 جنيه
كيلو السكر 3.5 جنيه
كيلو الرز 4 جنيه
كيس مكرونة مصرية4 جنيه

علبة الصلصة 5 جنيه
كيلو اللبن 5.5 جنيه
كيلو الدقيق 3.5 جنيه
كيلو الليمون 3 جنيه
كيلو البصل 3 جنيه
كيلو الخيار 5 جنيه
كيلو الطماطم 3 جنيه
كيلو الجزر 4 جنيه
كيلو الفلفل 5 جنيه
كيلو الموز 3.5 جنيه
كيلو التفاح 10 جنيه
كيلو الجبنة البيضا 22 جنيه
كيلو الجبنة الرومي 44 جنيه
رغيف العيش ربع جنيه
كارتونة البيض 15 جنيه

كيس الاريال 7 جنيه
زود عليهم بقا

بنزين للمدعوقة 300 جنيه
موبيلات وتليفونات 400 جنيه
اكراميات وكل سنة وانتي طيبة 120 جنيه
ادوية برد ومضاد حيوي عشان صباعي مدوحس 50 جنيه

ميمو: طب معلش.. بعد ازنك بقا من الحتة دي عشان هاروش فنيك وامسح
ضميري:على فكرة يا مها انتي مادية وواطية
ميمو : يااختي واطية واطية بس ربنا عرفوة بالعقل...امسك يا محمود العشرين جنية دي هاتلك وجبة كنتاكي سبايسي وانت مروح

2007 عام الخنزير

بالتقويم الصيني 2007 عام الخنزير و 2008 هاتبقا عام الفار يعني ماسخم من سيدي الا ستي وخلاصة سنه2007 ربنا ما يرجعها سنة ويكفينا شر المستخبي

سافروا اللي يقروا وبقيوا اللي يخرو.......... كلمة عم حسين بياع الجرايد الاستفزازية يوم ما اتغلبنا 3/1 في ماتش الاهلى والنجم الساحلي بغض النظرعن اللعيبه التوانسة اللي حولو الاستاد لمستشفي الاهلي التخصصي والحكم الي كان قابض تمن سكوتة..انطق ادوك كااااااااااااااااام يا خاين يا بتاع تونسسسسسسسسسسس

اسمها قمر وأبوها شهاب وشكلها زي الهباب......كلمة ام حسن جارتنا بعد لما نزلت علواد حسن بالجزمة اكمنة قلع سلبوتة وفكها قدام باب شقتنا اعتراضا منى على عدم تربية الواد وامه ومحاولة حقيقية لضمهم الي حزب احترام الشطافة

متشلحش للدبور وتقول ده مقدور..........نصيحة دكتور الباطنه (الي بيفهم في كلو) بتاعي ....ايوه بتاعتي انا بدفع تمنين جنية كشف يبقا تبعي وبتاعي وبتاع الي خلفوني واولادي واحفادي واللي يخش البلوج واللي يتشددلي

تيتي تيتي زي ما رحتي زي ما جيتي......كلمة جدتي بعد كل عريس مذبذب ومهلهل ومتنيل بستين نيلة ....ايماناً منها ان المصايب الي باكعبل فيها عباره عن جوائز السماء للفقرية المتمثلة في شخصنا الكريم

بلا شيله ولا حطة رايحة على جمل وراجعة على قطة......كلمة واحدة صاحبتي في قاعده غم للمره الستعميه الي واحده صاحبتي تانية حبت واحد حلقلها مما ادى الي استهلاكنا كرتونتين مناديل وازازه كولنيا تلات خمسات وكيلو لب ابيض وداستيت لبان دكر وبودرة تلج لعلاج المأسوف على شبابها من اعراض الكسورو الضعف والشيخوخه والعمي والهبل المبكر لعضلات القلب

الشاطرة تغزل برجل حمار ... كلمة مديري وهو مقتنع ان اليوم عبارة عن تمنتلاف و ربعميه و اتين وخمسين ساعة ساعة مش 24 زي ما قالولنا في المدارس

إن كنت رايح كتر النوايح...........هوه هوه ابن المفعصة بعد ما طفشني من المكتب والادارة بسيل من المدح والشكر والعرفان والتقدير لجهودي تجاة اعتاب الروتين الحكومي المقدس وزياده لزل محدودي الدخل والمواطنين -- سامحني يا رب

يغور اللبن من وش القرد...........كلمة خالد قبل ما يقرر يسيب توفيق ويتجوز منى ويفرقع بوز اهلى اعترافا منه بادعائة الشذوذ للهرب من لساني ولاعتقادة اني ما بيتبلش فبقي فولة ....مين اللي قال كدا ؟؟؟؟ طب ما انا عمري ما حكيت لحد على موضوع ياسمين اللي كانت في العربية عالمحور ؟؟؟

عبر الخر--يتجعص لورا ........كلمتي الي عسكري ولايسوه كنت بابوس ايده يهربني من العقيد والعلقة يوم القسم ومن الجدير بالذكر ان بعد هذة الكلمة فقدت حاسه السمع تماما وجذء كبير من القدرة على المشي

الغجرية ست جيرانها ان ما خافو منها خافوا من لسانها.........كلمة البواب بعد كل خناقه ليا مع مراتة ببصة حاسدة حاقدة ضاغنة لتمتعي بلسان حاد قادرعلى فضح وتجريس كل من سولت له نفسة التعرض لشخصي في الرايحة او في الجاية

العيلة اللي مافيهاش صايع .. حقها ضايع........كلمة خالتي كل اما نضرب في خناقة ..حافذ لينا للدفاع عن كرامتنا وسبب رئيسي لتطور الوضع من مجرد كدمات لغرز وكسور مضاعفة

لا الخنفة بتبور ولا ام بربور..........كلمة ام شوشو صاحبتي كل اما تشوف خلقت اهلى ...قصدها ايه الوليه دي ؟؟
أرتاح العريان من تعب الغسيل .... كلمة امي لما نزلت على موبيلي بالشكوش مما ادي لتحوله الي حتة بتاعة بعد ما شافت مرة فاتورة مكلماتي وبعد ما تاكدت في مرة اخري انو مصدر ازعاجها و صحيانها من احلاها نومة وللفقيد الرحمة ولنا السلوان على الخسارة الفادحة

اللي ما عنده مرا حاله زي الخر-..........كلمة ام سميرجارتنا لسمير من ساعت ما اتهبل وبقا بيجري ورا قطط الشارع كنتيجة طبيعية لأعلانات ميلودي وبوبي اللي شردت الملل وجرستة وطلعت البلا على جتته وجتت الي شاف الاعلان
تعملى ايه يا خايبة بحبالك الدايبة.......كلمة مهندسة زميلة في ميعاد القبض عند اكتشاف الصدمة المتمثلة فالثبات الوضيع للمرتب مع التغير المبهر والمستمر للاسعار

وأسمع سلام سنة جديدة تجيب بواسير ....وحسبي الله ونعم الوكيل
---------------------------

انبي يا سيدنا يخاليهملك حقوق النشر محفوظة لصحبت البلوج والمطرح اسمالله على مقامكو البوستات نازلة في جرايد ومنتديات وكتب بأسامي مخلوقات تانية داحنا مصريين زي بعض يا اخونا .. انتو ملكوش اخوات موظفيين ولا ايه !! ربنا يوسع عليكو وعلينا ولا يرميكو في ضيقة لوينوبنا مالحب جانب الواحد هيعمل نفسه مخدش بالو يعني كيلو رز شويه زتون مخلل حته حلاوة بالقشطة رغيف فينو كيلو حرنكش اهو يبقا رضا قوي ..ربنا يجعل بيت المحسنين عمار وهنيالك يا فاعل الخير والثواب

قضيه ادااااااااب

قاعده بقزقز لب لا بيا و لا عليه و جالي تليفون من الواد فتحي ابن خالتشي والي ميعرفش فتحي فهوا واد عامل نفسو راجل ومعلش خدو بالكو من عامل نفسو دي... المهم الواد كالمني

فتحي ابن خالتشي : الحقيني يا بنت خالتشي واحد صاحبي اخد مفتاح المخزن بتاع زايد وجاب فيه بنت والجيران وادتو على القسم وده صاحبي ولازم اخرجو وونبي يا ميمو توصليني لحد قسم الشيخ زايد

وقد كان وصلنا لقينا القسم كلو بيضرب في الواد صاحبه والبنت اللي معاه اتاري صاحب البيت ظابط  وصاحب ابن خالتشي كان بيجيب حجات من المخزن لوحده وخطيبت صاحبة كانت مستنياه في العربية والظابط صاحب البيت  لفقلهم اداب عشان ابن خالتشي يسيب المخزن    ... انا قلت مش هادخل بس ان جيتو للحق انا خفت قلت اخد الواد اروحوه لامه واكسب في البت ثواب وده ودي عيال جامعه امريكيه واخرهم هيقعدو يعيطو واصلي باروح افلام عادل امام وعارفه اللي فيها

دخلت القسم ولسه بقول للظابط

ميمو:ممكن حضرتك تندهلي الناس الي جوه بس عشان امشي ويا ريت كوبايه ميه

مطلعشي ظابط طلع عقيد طن طن طااااااااااااااان مبدئياً راح منولني بالبوكس في خلقتي وهبدني شلوت في بطني

ميمو: ليه كده بس انا عملتلك حاجه يا عم انت

العقيد طارق: انتي يا بت انتي ازاي تردي عليا وتقوليلي ممكن كوبايه ميه مش كفايه انك جايه تطلعي عيال وسخه يا بنت المت....يا ...انت يا ابني اعملها قضيه انها كانت مع العيال دي في الشقه

ميمو: يا نهار اسود انت هتتبلا عليا داحنا ناس محترمه ومهندسين وقريبه وزير وبسال عالواد ابن خالتشي عشان اتاخر

راح طالع علينا بالجزمه والبوكس والشلاليت والالكام واللزي منه واديلو ادي .. كنت لسه هفرتكو وافعصو بصيت لقين نفسي اغمي عليا.. فلت من ايدييييييي ...فقنا لقينا نفسنا ملقحين على البورش نشفو دمنا شويه ودخلونا للمامور

المامور : معاكي بطاقه

ميمو: في العربيه يا فندم ..ممكن كوبايه ميه ؟؟؟

المامور : ليه قالتي قدبك علي سياده العقيد طارق ؟

ميمو: حضرتك مش شايف اللكميه الي في وشي ودراعي المكسور... وهوا انا لحقت اساسا

المامور:انتي ايه الي جابك؟؟

ميمو: الواد ابن الجزمه ده عشان فافي وكان عايز يطلع صاحبه

المامور:انتي كنتي هاتلبسي اداب

ميمو: يا باشا الواد يجي 17 سنه اخره يعني كتر خير الدنيا انه بيروح الحمام لوحده

المامور :طيب انزلي امضي على المحضر واتفضلي اعتزري لسياده العقيد طارق

ميمو: حسبي الله و نعم الوكيلللللللللللللللللللللللللللللللل

فتحي ابن خالتشي: انتي ايه الي دخلك معايا القسم ؟؟

ميمو : والله عال نضرب ونسمع شتايم عنب عشان ابو شخه مبيعرفش يتصرف لوحده وخايف من امه ويا ريته تمر في اهلك

 طبعا العقيد كان ملفقلي تهمه وعشان يسبكها ويلبسهالي ويبوظ سمعتشي ويدمر مستقبلي قال اني ماشيه من غير بطاقه فلما مضيت على المحضر كتبت نفسي مروه السيد احمد عبد ربو واقطن بدير النحاس رقم 7

---------------------------------------

تحذير: لكل من يسكن في الشيخ زايد .. خد عيالك وعزل ..هوا الواحد فينا ايه غير كرامه وكرت واسطه ...واه يا عيني

 

يقطع التعليم وسنينة

جامعة حكومية

طالب جامعه محليه مضروب بالنار بيجي من اربعه الفجر عشان يقعدلي قدام تقديره دخله كمبيوتر وهوا ولا عمره شاف كمبيوتر ولا هايشوف اساسا و مقتنع اقتناع تام انو هاينجح في الكمبيوتر نظري – يتكون الكمبيوتر من فاره ولوحه مفاتيح و
الطالب :المودم ده اللي بيوصلنا بالانترنت ؟
ميمو: ايوه
الطالب :الكمبيوتر ده الي بيوصلنا بالانترنت؟
ميمو:ايووووووه
الطالب : التليفون ده بيوصلنا بالانترنت ؟
ميمو:ايووووووووووه
الطالب:على فكره انتي بتدينا معلومات متناقضه وهشتكيكي لدكتور الماده

الخلاصه : قف للمعلم ولاعبه صلح .... اديلوعلى افاه وممكن تقبح

كمبيوتر ايه ومودم ايه هوه لاقي ياكل ... ابقا ادخله السكشن بسندوتش حلاوه بالقشطه وقزازه صاروخ وهيبقا زي الفل ...ده لو شاف دكتور الماده يعملها على روحو

جامعة خاصة

طالب في جامعه خاصه من الي بيدفعو مرتبي لمده تمانين سنه قدام .. عشان ياخد شهاده هز طوله واتخانق مع البت صحبته عشان يحضرها اخر سكشن مراجعه قبل الامتحان - شوفتو الواد خايف على مستقبلها ازاي

ميمو: يا جماعه حد يعبرني ويجاوب اي سوال ... طب حد يعرف انا بدرس ايه اساساً ؟
الطالب : اجاوب انا ؟؟
ميمو: ايوه يا ابني ربنا يسعدك
الطالب:حاجه ليها علاقه بالكمبيوتر
ميمو:برافوووووووووو
الطالب: برافو حاف كدا؟؟ مفيش حاجه تطريها؟؟؟
ميمو: طب ممكن تشيل ايدك من على زميلتك عشان ده سكشن مش شقه مفروشه

الطالب: انتي بس تلاقيكي غيرانه؟

الخلاصة: قف للمعلم واديلو بوسه ...... اصل المعلم بيفهم جاموسه

بلا تعليم بلا نيله بقا دي عيال عايزه تتربا من اول وجديد ... لولا انها سبوبه كان بقا ليا كلام تاني

عزيزي خليفه...تحيه طيبه وبعد

راجعين من الاستفتاء انا والعيال بتوع الاداره الهندسيه تقولوش كنا بنفتح مكه ولسه هانتفرج على فيلم كارتون في المكتب عندي ربنا ما يقطعلنا عاده وطب علينا ابن المؤذية

كالعاده دينا تبولت لا اراديا وشريف عمل نفسه بيكلم امه في الموبيل وريهام سورقت وهشام قعد يتهته ويتفتف وياسمين جريت ويامن قعد يلعب في منخيره وانا حاولت ابرر الجريمه الي احنا عاملينها دي ومعرفتش فاتخصملي يومين .....طيب احاول اهدي الجو ازاي ؟؟ازاي ؟؟ احنا هنبعت نجيب فطار لما اسالوه كدا يمكن يحب يطفح معانا
ميمو:حضرتك احنا هنبعت نج..ب

المدير : اللي عاوز يطلب مني حاجه يبعتلي جواب مكتوب على ورق أبيض بصيغه رسمي انا مش شغال عند اللي خالفوكو ..كل اما تشوفو خلقتي تسالوني على حاجه .......طرااااااااااااااااخ - ده باب الاوضه بتاعتو.....رقيق وزوق وحساس بطريقه ....امري لله نكتب خطاب رسمي

السيد / مدير الاداره الهندسيه بالمصلحه
السلام عليكم ورحمه الله وبركاته .........تحيه طيبه وبعد

عزيزي خليفه
بعد السلام وجزيل الشكر ....بعتنا نجيب طعميه سخنه من الشبراوي نجبلك معانا ولا هتاكل لوحدك زي كل يوم؟؟؟؟
مع اطيب تمنيات العاميلن بالمصلحه وفائق الاحترام والتقدير
امضاء
الهفتانين انتطار للطعميه
ملحوظه :السؤال لغير الله مزله ولو مش عايز ان شالله عنك ما طفحت...... هنطلب احنا

اطبع ...وحط الجواب في ظرف عليه ختم النسر...وملحسه للسكرتيره تدخل الجواب بسرعه....ودخلت بالظرف .لحظه صمت .... باب القوضه يفتح في عصبيه وراس المدير طالعه
المدير : ياا نيلـــــــــــــــــــه دخليليييي المتخــــــــلف الي بعت الجواب ده
ميمو: برستيجي يا ناس مش معقول كدا

دي طاهره الرقاصه

عصفوره الساعي بتاع المصلحه فرحه قرب لو مرحتش هيقعدو يقولو دي عنصريه وطبقيه وامبرياليه
يعني ايه امبرياليه صحيح ؟؟ مش طالبه مناقشات بيزنطيه دلوقتي .. يعني ايه بيزنطيه؟؟ الواحد بقا بيتكلم زي بتوع المدونات الليبراليه ...يعني ايه ليبراليه؟؟ يوووه مش هنخلص في ام البوست ده
عصفوره يبقي السوسه بتاع المدير اديلو خوازيق ومهاميز والبشمهندسه وصلت الساعه واحد ونص والبشمهندسه مجتش امبارح والبشمهندسه سايبه المكتب وعماله تهزر مع السكرتاريه يعني ان شاء الله كدا اشوفو والع بجاز وسخ ... بس ان كان لك عند الكلب حاجه اديلو يا سيدي
ميمو: ها يا سيدي الفرح هيبقا فين؟
عصفوره:عندنا في امبابه في حاره النسانيس (طلع في مكان في امبابه اسمو كدا)اه والله
المدير قال لازم نروح يبقا كدا الفرح بقا تكليف والي ميرحش هيتخصملو من الحوافز صبرني يارب وبلاد تشيلنا وبلاد تحطنا وصلنا في عز المعمه
ميمو: ايه الخرتيت الي بيتدئلج على المسرح ده؟
معزوم:دي طاهره الرقاصه
ميمو: ومين ابن الكدابه الي سماها
شويه طلع واد بمطوه على البيست ..انا قلت هيقتلها و نتاويها ونخلص اتاريه طالع يرقص معاها
ميمو: ارجع يا مجنون هتفعصك زي الصرصار دي واكله منك تلاته بيلعبو في بطنها اهم
مديري:شايفه الفلكلور هوا ده الفن بصحيح
ميمو:يا طاهره انزلي كدا خطر علينا و على اللي في بطنك
الفرح كان مليان بيره وخيار متقطع بيقولو عليه مزات وسجاير ملفوفه الله يخرب بيته الي كان السبب انا ايه اللي جابني هنا
ابو عصفوره كان شارب طينه ومبسوط بقا ولمحني وانا بحدف الرقاصه بالطوب (كنت بعبر عن رايي) قال يعني الطوب حوق فيها
ابو عصفوره :دفعولك كام يا بت عشان تبوظي الفرح.مين اللي مسلطك ؟؟
واحد صاحبو حب يخدم :البت دي من طرف اوكشه بتاع بولاق الدكرور
ايه ما نتو عارفين اللي فيها ..... قس البلاوي و المصايب خارج يقول اجمل حاجه في الفرح الرقاصه ؟
ميمو: اه ه ه...فعلا ..اه ه يا ضهري