ستك ستارز

حيث ان المجتمع مليئ بالدراما الاسرية والماسي المادية المتمثلة في انعدام الموارد والنزاع على ما تبقي من معنويات ....مش فاهمة حاجة من الكلام اللي بقولو ..بس القصد يعني رجعتلكو اقوا مالاول وهقرفكو هاقرفكو

احنا اتعلمنا اية ؟ ايوة ..منفتحش باب الشقة عشان مبيجيش من وراه الا المصايب والبواب عايز فلوس ودفع العداد وبتاع الزباله واحنا اخر الشهر ومش طالباها نبيع الهدمة المتبقية اسمع

شوشو: طاخ طاخ....افتحي يا مها انا عارفة انك جوة .....طاخ طاخ طاخ ..افتحي والله هاكسر باب الشقة

ميمو : اشتاتا اشتوت ......انصرف

و فتح الباب كمداُ وقهراً ودي ناطت في كرشي

شوشو: يالا بينا يالا يالا يالا يالا بينا يالا نروح لستي ستارز

ميمو :انتي هاتصتعبتشي ستك اسمها ناعسة والله يرحمها ماتت في طابور المعاش

شوشو: يا متخلفة دا مكان هاي قوي الناس الكلاس بيشترو منه حجات

ميمو: اديكي قلتيها كلمة ....احنا بقا نروح نهبب اية

شوشو: افضلي انتشي كدا كسري في مجاديفي واحبيطشينا يالا انزلي قدامي

وسلمت امري الي الله وانا جيبي مفيهوش الا عشرة جنية عامية كنت هاجيب بيها سندوشتات وطبق كشري ونزلت معاها لحد ما وصلنا مدينة نصر ودخلنا اسماله على مقامكو حتة كدا نور في نور وماليانا ايس كريم وملبس .....احم لا مش طاقة القدر دة ستك ستارز.....دخلتنا محل حاولت مرارا و تكرارا انطق اسمه ولم انجح حتي الان القصد

شوشو: الله المحل دة في حجات جميلة قوي تعالي

ميمو : دة شكلة غالي طحن

شوشو:يووووووووووه اسمعي الكلام .... تعالي

نقت شوشو بلوزة لونها فوشخقي فاتح ....مكتوب عليها 1200جنية وتمسكت بيها تمسك العقربة المخصبة بذكرها في موسم التزاوج

مدير المحل :الحساب 1200 جنية

شوشو: مش هادفع اكتر من مية بس

مدير المحل :دة السعر من المصنع يا هانم البلوزة سعرها كدا

شوشو: واللهي ما دفعة ولا مليم زيادة دانا شايفاها في الشواربي باربعين جنية

وحطت البلوزة في شنطتها واتجهت الي الباب في خطوة سريعة وهنا صرخ مدير المحل

مدير المحل : انتي يا هانم رايحة فين ....ساكيورتشيييييييييييييييييييييي

ثواني و انفتح باب المحل ووراه 8 جدعان ببدل وعصيان..... لاء ... لسة شوية

ميمو : يا رجاله للامانة بس..... الست دي مرات الراجل دة .... وديا حبت عين امها بقالها اكتر من سنةونص محرومة من اللقمة هي وعيالها الاربعة ......وانا صعب عليا بهدلتها في المحاكم ..فقلت اجبها نخلص الموضوع ودي هنا ....يمكن قلبه يحن ويديها اي حاجة تفرح بيها العيال ..... حقها يا اخوانا ولا مش حقها

الامن :حقها يا هانم حقها ...حسبي الله ونعم الوكيل فية حد يرمي عيالة ومراتة دانت هتتسئل عليهم يوم الدين معلش يا مدام حقك علينا احنا هانروقهولك لحد ما يجي لحد عندك ويجبلك الحاجة بنفسة

ميمو: لولولولولييييييييي..منصورة يا اختشي منصورة

ربنا يديكو الصحة يا رجالة ....البركة بالشباب... اقعدو بالعافية نستاذن احنا بقا

خدتها في ايدي و طيران على الاسنسير

ميمو: دي عاملة تعمليها فيا ..اللي ممعهوش ميلزمهوش

شوشو: امال لو عرفو ان انا خدت التيير والجيبة دول كانو عملو فينا اية

ميمو: يالهويييييييييييييييييييييييييييييييي

بيت الحزين معلم بالطين

غيبة وخيبة وفر وكر وادينا متنيلين متقندلين راجعين كاتبين حامدين لربنا على سلامتنا وشاكرين ...... اللي بعده

بقا اسمالله على مقامكو المرتب زاد سبعتاشر جنية وتلاتين قرش واربعة مليم .. كلمة قبيحة..القصد..الحك... الحداية بتحدف كتاكيت يا جدعان والمصلحة اتقلبت ... طيب نعمل بيهم اية فأم البلوج المتراقب ده ...اقترحو

اولا : نفك كوشتتة اتوبيس مية اتنين وخمسين عتبة ونضرب بيها غطس فالمريوطية
ثانيا : نفصل جلد كراسي مية اتنين وخمسين عتبة شورطات اسكرتش لزوم دخول التصييف

ثالثا : نشتري نادي الزمالك .... ونبيع اللعيبة فرط ... بعد ما نحط صورة عبواحد السيد على فنلات النادي ونكتب تحتيها راحت تاخد بتار ابوها رجعتلنا حبله
رابعا : نزيع حلقات مهند ونور لاجل ما نثبت انها عورة وابوها عبد ودخلتها يوم الحد ونمرودة ونكدية وبنت كلب وعايزة الحرق
خامسا : نصدر حشيش لاسرائيل ... بدل الغاز الطبيعي يمكن نعدل المايلة .. وخاليها تضرب مخدرات بدل ما تضرب غازات
سادسا: نجيب بالتلاتين قرش حديد ... يمكن يشح وخلي الراجل يستفتح والغلابة تاكل والشباب تسكن ... ويتربا فعزو حديد عزو
سابعا: نشتري شقق حداشر متر فالتجمع واكتوبر فيها ملاعب وولف , فسين , مدارس انفرمشونال ومطاعم سي فول
واخيرا: نجيب جلاليب من كرداسة وشباشب زيكو من باب النزاهة والوجاهة وكيد العوازل يا لمونة واستبدالا للجلاليب الكستور والقباقيب منزوعة الوش

ينعل ابو القرش الي ما يمتعش صاحبو

ويا بيت الحزين يا معلم بالطين يا انا.... ياانا .. وفي حارة القرع يا بخت من مات وفي راسة قملة .... وولاد الحرام ماسبوش لولاد الحلال حاجة يا ابو النضافة ياحمد

جمهورية وسخونيا

راجعين من ماتش الأهلي والزمالك متهشتكين من اللي يسوا واللي ميسواش عشان اترزعنا في مدرجات نادي الزمالك واحنا لابسين احمر- التذاكر هناك ارخص صراحة ومبتخلصشي والباب بتاع مدرجات الزمالك فاضييييي رافعين رايات النصر والعيال أية وشها مورد وباين عليهم اللقمة والحياة بقت حمرا ومروحين بالطبل والزغاريط والزفة كالعادة إنبي لوهولمان نفسة اللي كان بيحكم الماتش كانو اتغلبو برضه

يعني وأول ما ندخل المنطقة نسمع الراديو بيقلك

الحكم ببرائة ابن الوسخة وابنو من قضية العبارة بنت الوسخة عشان القاضي ابن الوسخة خايف يتئذي من ولاد الوسخة في البلد اللي فيها الفساد بقا على عينك يا تاجر

واذكر بمناسبة الحديث ابن الوسخة ده جلسة مجلس الشعب الموقر لما قام الأخ خالد الذكرعزمي وقالك : يا جماعة ده صاحبيييييييييي وحبيبي ومستحيل يعمل حاجة بنت وسخة ذي دي والقضاء هيثبت صحة الكلام الوسخ اللي بقولو

واذكر برضة ان وحيد حامد من سنتين قال: انا هعمل فيلم يبين الحادثة بنت الوسخة دي ومنعة محامي ولاد الوسخة وقالة: موكلي هيطلع براءة براءة يا روح خالتك انت متعرفش هوا شريك مين

الشعب :امال الغلط دة.... مين ابن الوسخة المسئول عنه ؟؟
القاضي : المسئول عنة ام سحلول عشان كانت بترضع سحلول وسابت الناس تغرق ؟؟؟
الشعب :وبروح أمك ام سحلول هتسيب الواد وتروح العبارة بنت الوسخة دي ليه ؟
القاضي : عشان شافتها وهي بتغرق المفروض ترمي سحلول وتنط تنقذها
الشعب : وهي مال أهلها بالعبارة دي . المسئول هوا اللي ماصلحهاش؟
القاضي: ما هوا مكنش عايز يصرف على العبارة
الشعب :آمال كان بيودي فلوس الناس والتذاكر دي فين؟
القاضي : كان بيشرب ويلعب ويتفسح مع صاحبة وحبيبة وشريكة في عزبت ابوهم ..انتو هاتقرفوني ليه ؟ أما شعب ابن وسخة صحيح

أنا شمتان في الحج ممدوح عباس بعد إن اثبت فشلة في إدارة نادي عريق ذي نادي الزمالك
وشمتان في أحمد النجار بعد إن اثبت فساد القضاء والقضاة في ظل الكوسة الإدارية للدولة
وشمتان في محمد حمودة محامي الشركة بعد ما الناس كلها دعت علية في ظل طرمختة على موكلة
وشمتان عشان صاحب العبارة كان عضو في مجلس الشورى والحزب الوطني ولجنة السياسات والامانة العامة بقرار شخصي من رئيس جمهورية وساخونيا

---------------------------

اقر انا المدون باصابتي بالتخلف العقلي والفصام والجنون واعفو نفسي باي شكل من الاشكال من تحمل اي مسئولية او مسائلة قانونية واعتذر لوجود الفاظ بذيئة خرجت عن ارادتي تحت تاثير الصدمة واني عيل عيل وستين عيل

ينعل ابونا احنا بقا

في عيادة دكتور السنان ملطوعة مستنية دوري ووقعت عيني على مجلة اجتماعية صارخة خليعة مثيرة ماجنة كافرة فاسقة فاسدة تدعى فلاش لاحسن تفتكرو اني اتلحست في نافوخي وكعيت عشرة جنية في مجلة زي دي ياييي .. بلدي أوي يا حسين...كل المجله عبارة عن الأتي
في حفل عائلي بهيج

احتفل معالي الوزير فلان الفلاني علي زفاف نجله إلي نجلة رجل الإعمال المعروف ترتان الترتاني

وأقيم الحفل في فندق مية نجمة وقمرين وامتد الحفل إلي الساعات الأولي من الصباح الباكر واحييا الحفل نخبة من نجوم الفن – دينا وعمرو دياب وهشام عباس وشاكيرا وارتدت العروس فستان زفاف صمم خصيصا لها من مصمم أزياء فرنسي مشهور بفخشوميت ألف دولار واشرف على ماكياج العروس وتسريحة الشعر مصمم الشعر الايطالي واشرف على تصميم قاعة الحفل فريق عالمي متخصص وقد ملأت الزهور النادرة قاعة الحفل وتم نقل البوفيه بالطائرة من فندق الريتز بباريس مباشرة إلي قاعة الحفل ثم سافر العروسان لقضاء شهر العسل في افخم فنادق أوروبا وامريكا ..الناس دي مش من هناا ولا اية ؟؟؟

طيب إحنا كشعب لما نعوذ نعمل مجلة اجتماعية نكتب فيها عن أفراحنا كأغلبية !! نكتب نقول فيها اية
في حفل عائلي بهيج برضوه

احتفل ابن خالة جوز اخت جار عسكري مرور ارض اللوا بزفاف ابن مراته على كريمة الحج شفيق صاحب كشك السجاير المعروف

واقيم الحفل في نادي شباب عزبة ابو تفة وأحيا الحفل نخبة من الموهوبين والعجزة وكبار السن – شفيقة الدلالة وأبوعادل العربجي وعبد النعيم بتاع الكرشة وقد ارتدت العروس فستان اخضر عشان ملقتش فستان ابيض عند محل الإيجار ثم تم توزيع سندوتشات جبنه بقوطة وجبنه بخيار وجبنه من غير قوطة وجبنه من غير خيار وأرواح ومشابك غسيل ثم أستقل العروسان مترو الإنفاق لقضاء شهر العسل عند خالت العروسة في شبرا
----------------------
ده على افتراض اننا لاقيين نتجوز ومعانا قرشين بنعرف نعمل بيهم أفراح

وزارة الملابس الداخلية

الجمعة بقا وقاعدة فوق سطوح بتنا على الكرسي البلاستك الهلال والنجمة ولابسا الجلابية الكستور الملوكي والشبشب ابو صباع والعز باين عليا قوم اية اسمع جرس التليفون

أمي:يااا ماااااااااهااااااااا واحده صاحبتك عايزاكي عتليفون

ميمو:وانا ايش عرفني انها صاحبتي ..ادتك امارة ؟؟

امي:انتي هاتنزلي تردي عالبنت ولا اقفل السكة في وشها ؟

ميمو:اقفلي...ولااقلك لاحسن تطب عليا اناااا نااااازلة

ريهام: الو بقلك يا مها تعالولي 6اكتوبر ضروري..أصل الفستان الي هاروح بية فرح لبني باظ

ميمو: مترحيش الفرح احسن
ريهام :مها ..هاتي البنات وتعالولي حالا

توالت التليفونات انقاذا للموقف واتفقنا نتقابل في ميدان لبنان و نروح كلنا بعربية واحدة ...واخدين المحور

والفرحة مالية عنينا وداخلين على الحتة الديقة الي قسموها رايح وجاي عشان يقهرونا نفسيا وفضلنا واقفين فيها لحد ما روحنا طلعت وافوجئء باية ؟...ظابط وامن وهيصة كبيرةمستنية العربية

الباشا: انزلي وهاتي رخصك
ميمو: لية يا بية بس يعني كل الهيصة دي عشان رخصي ده كتير عليا كدة واللهي يا فندم وبعدين سعدتك انا رابطة الحزام وماشية على 30 سعادتك وملوش لازمة الاهانه سعدتك داحنا بنحب مصر سعادتك

الباشا:احجز اللي بترد دي ينعل ابو .. يا ولاد ال ... وهات اللي معاها ..ابقي ردي براحتك في القسم يا..احم ولا بلاش
ميادة : هما واخدينا على فين يا ميمو
ميمو: يعني ظباط ومجرجرينا من العربية تفتكري هيودينا فين؟ اكيد الحديقة اليابانية

ميادة:يا فندم مايصحش كدة.. ممكن نحل الموضوع بهدوء

هنا غوريلا في ايدها عصاية مسكتني وسحبتني لحد الباشا الظابط

الباشا :انتي جاية 6 أكتوبر لية يا روح خالتك؟ ومين اللي قالك تيجي؟ ..رايحة القرية الزكية ؟؟

ميمو: واللهي العظيم يا باشا انا ما رضيتش اروح القرية الفرعونية مع عيال الجيران وماليش فالخروج نهائي سعدتك ...انا واللهي هاقول على كل حاجة ومش هاخبي اي حاجة .. هيا منها لله لبني انا قلتلها متتجوزش اليومين دول ....ما سمعتشي كلامي ....شوف يا بية ريهام كلمتني عشان الفستان الي عملتهولها ام عماد الخياطة طلع ضيق شوية وماسك من عند الوسط .... انا قلتلها يا ريهام اللبسي الفستان كدة مسمعتش كلامي واشترت نص متر كريب جورجيت.. وصممت توسع الفستان وقالت لمو عماد.. هاتوسعيلي الفستان يعني هاتوسعيلي الفستان ..رديت عليها امو عماد وقالتلها : انا مش فاضية وهاتستلموه كدة واضربو دمغاكو في الحيط ..سعتها بقا ام عماد كانت لسة مبيضة الشقة ..فريهام ملقتش حتة تضرب دمغها فيها ...وفنفس الوقت شيماء عاملة فستنها عند ام عماد برضو..... قوم لما عرفت راحت شخطط في الولية ....قامت الولية اتخضت وطردتنا مالبيت ...قمنا واخدين الفساتين وطلعنا على الترزي الرجالي الي في اخر الشارع وادنالة الكريب جورجيت عشان يوسع الفستان طلع التزري دة جوز ام عماد قام سالنا...... انتو مين اللي عملكو الفساتين دي ...رديت علية شيماء وقالتلوة : الولية المجنونة اللي في اول الشارع ...سعتها بقا ريهام بصت لقيت صورة فرح الترزي على امو عماد في الصالة.. راحت ماسكة الترزي مواقعاه عالارض ..وميادة كانت واكله سندوتش مؤمن ... قامت مرجعة علي الترزي... قام الترزي مسك المقص وبوظ الفستان

بس .. هي دي كل الحكاية سعادتك .. وأنا والله العظيم بريئه

الغوريلا: يا باشا مش دي العربية المطلوبة دي عربية بنفس مواصفات العربية اللي عايزينها

بدور وشي لقيت العساكر موقفين عربية نفس نوع عربيتنا ونفس اللون وارقمها قريبة جدا بس راكب فيها شباب بدقون

الغوريلا:هيا دي العربية المطلوبة والارقام مطابقة
ميمو: هما دول العيال اللي حضراتكم كنتم مستنينهم
الغوريلا :ايوه امشو انتو خلاص كدة
ميمو : خلاص اية يا باشا!!! دانا دمي نشف وركبي سابت سيادتك كمل مج النسكافية بتاعك وسبلي ولاد الهرمة دول.. تركبو عربية زي عربيتنا لية يا كلاااااااااااب مش كفاية الفستان طلع ديق عالبت

المادية الواطية

في يوم من هذا الشتاء القارص اتعزمت على سبوع بنت دعاء صاحبتي وده واجب والبت مجملاني وخيرها على الي جابوني والي خالفوني فلازم احس على دمي يعني واباركلها ورحت . بعدين ماسكة انا بقا صينية الملبس والشيكولاته امو 40 جنية الكيلو وقاعده احف اقوم افوجوء بشاب غريب كدا بيبصلي في صينية الملبس يا رب مازورش والله ولااااا فتفوتة انا الي شفت الصنية الاول تبقا من نصيبي

الواد: مساء الخير انا محمود اخو دعاء وابقا خال النونو
ميمو :وفيها ايه يعني ......انا مها والملبس ده بتاعي
محمود :انا شفتك كتير مع دعاء وبصراحة هي بتشكر في اخلاقك قوي

تسبيل بقا ومسح ادينا من لغوصة الشوكلاته وتنشيف البرابير وازاله فورية للعماص واي اثر للمزاكرة والاجهاد وسرسعة صوت

ميمو: ميرسي كتير واللهى الناس كلها بيشكرو فيا على طول كدا..احم
محمود:بصي يا مها انا صريح ومبحبش اللف ولا الدوران...... انا بفضل الله محاسب ومرتبي 600جنية وعايز ارتبط بيكي رسمي بس معلش افضل انك لازم تقعدي في البيت

صمت رهيب وتتنيح وغيبوبة مؤقتة جت بعديها لحظة عدم استيعاب..احمدك يا رب واحد ربنا اعمي بصريتوه وامه داعية علية

ميمو : انت عايز تتجوزني انا ؟؟ تكتب اقرار بكدا؟؟ قصدي دة شرف ليا يا استاذ محمود بس اديني فرصة افكر خلاص فكرت وموافقة
محمود : خلاص يعني انتي موافقة على انك تقعدي في البيت دة شرطي الاساسي؟؟

مش عارفة لية جت على بالي تصريحات وزارة التجارة والتنمية المحلية بخصوص الاسعار الجديدة

كيلو اللحمة 40 جنيه

الفرخة 25 جنيه
قزازة الزيت 9 جنيه
قزازة الخل 7 جنيه
علبة السمنة 46 جنيه
كيلو العدس 6 جنيه
كيلو الفول 5 جنيه
كيلو السكر 3.5 جنيه
كيلو الرز 4 جنيه
كيس مكرونة مصرية4 جنيه

علبة الصلصة 5 جنيه
كيلو اللبن 5.5 جنيه
كيلو الدقيق 3.5 جنيه
كيلو الليمون 3 جنيه
كيلو البصل 3 جنيه
كيلو الخيار 5 جنيه
كيلو الطماطم 3 جنيه
كيلو الجزر 4 جنيه
كيلو الفلفل 5 جنيه
كيلو الموز 3.5 جنيه
كيلو التفاح 10 جنيه
كيلو الجبنة البيضا 22 جنيه
كيلو الجبنة الرومي 44 جنيه
رغيف العيش ربع جنيه
كارتونة البيض 15 جنيه

كيس الاريال 7 جنيه
زود عليهم بقا

بنزين للمدعوقة 300 جنيه
موبيلات وتليفونات 400 جنيه
اكراميات وكل سنة وانتي طيبة 120 جنيه
ادوية برد ومضاد حيوي عشان صباعي مدوحس 50 جنيه

ميمو: طب معلش.. عن ازنك بقا من الحتة دي عشان هاروش فنيك وامسح
ضميري:على فكرة يا مها انتي مادية وواطية
ميمو : يااختي واطية واطية بس ربنا عرفوة بالعقل...امسكي العشرين جنية دي هاتيلك وجبة كنتاكي سبايسي وانتي هاتبقي فلة

2007 عام الخنزير

بالتقويم الصيني 2007 عام الخنزير و 2008 هاتبقا عام الفار يعني ماسخم من سيدي الا ستي وخلاصة سنه2007 ربنا ما يرجعها سنة ويكفينا شر المستخبي

سافروا اللي يقروا وبقيوا اللي يخرو.......... كلمة عم حسين بياع الجرايد الاستفزازية يوم ما اتغلبنا 3/1 في ماتش الاهلى والنجم الساحلي بغض النظرعن اللعيبه التوانسة اللي حولو الاستاد لمستشفي الاهلي التخصصي والحكم الي كان قابض تمن سكوتة..انطق ادوك كااااااااااااااااام يا خاين يا بتاع تونسسسسسسسسسسس

اسمها قمر وأبوها شهاب وشكلها زي الهباب......كلمة ام حسن جارتنا بعد لما نزلت علواد حسن بالجزمة اكمنة قلع سلبوتة وفكها قدام باب شقتنا اعتراضا منى على عدم تربية الواد وامه ومحاولة حقيقية لضمهم الي حزب احترام الشطافة

متشلحش للدبور وتقول ده مقدور..........نصيحة دكتور الباطنه (الي بيفهم في كلو) بتاعي ....ايوه بتاعتي انا بدفع تمنين جنية كشف يبقا تبعي وبتاعي وبتاع الي خلفوني واولادي واحفادي واللي يخش البلوج واللي يتشددلي

تيتي تيتي زي ما رحتي زي ما جيتي......كلمة جدتي بعد كل عريس مذبذب ومهلهل ومتنيل بستين نيلة ....ايماناً منها ان المصايب الي باكعبل فيها عباره عن جوائز السماء للفقرية المتمثلة في شخصنا الكريم

بلا شيله ولا حطة رايحة على جمل وراجعة على قطة......كلمة واحدة صاحبتي في قاعده غم للمره الستعميه الي واحده صاحبتي تانية حبت واحد حلقلها مما ادى الي استهلاكنا كرتونتين مناديل وازازه كولنيا تلات خمسات وكيلو لب ابيض وداستيت لبان دكر وبودرة تلج لعلاج المأسوف على شبابها من اعراض الكسورو الضعف والشيخوخه والعمي والهبل المبكر لعضلات القلب

الشاطرة تغزل برجل حمار ... كلمة مديري وهو مقتنع ان اليوم عبارة عن 8739 ساعة مش 24 زي ما قالولنا في المدارس

إن كنت رايح كتر النوايح...........هوه هوه ابن المفعصة بعد ما طفشني من المكتب والادارة بسيل من المدح والشكر والعرفان والتقدير لجهودي تجاة اعتاب الروتين الحكومي المقدس وزياده لزل محدودي الدخل والمواطنين -- سامحني يا رب

يغور اللبن من وش القرد...........كلمة خالد قبل ما يقرر يسيب توفيق ويتجوز منى ويفرقع بوز اهلى اعترافا منه بادعائة الشذوذ للهرب من لساني ولاعتقادة اني ما بيتبلش فبقي فولة ....مين اللي قال كدا ؟؟؟؟ طب ما انا عمري ما حكيت لحد على موضوع ياسمين اللي كانت في العربية معاة عالمحور ؟؟؟

عبر الخر--يتجعص لورا ........كلمتي الي عسكري معفن كنت بابوس في ايد عيلته كلها عشان يهربني من العقيد والعلقة يوم القسم ومن الجدير بالزكر ان بعد هذة الكلمة فقدت جذء كبير من قدرتي على المشي والنطق

الغجرية ست جيرانها ان ما خافو منها خافوا من لسانها.........كلمة البواب بعد كل خناقه ليا مع مراتة ببصة حاسدة حاقدة ضاغنة وذلك لتمتعي بلسان حاد قادرعلى فضح وتجريس كل من سولت له نفسة التعرض لشخصي في الرايحة او في الجاية

العيلة اللي مافيهاش صايع .. حقها ضايع........كلمة خالتي كل اما نضرب في خناقة ..حافذ لينا للدفاع عن كرامتنا وسبب رئيسي لتطور الوضع من مجرد كدمات لغرز وكسور مضاعفة

لا الخنفة بتبور ولا ام بربور..........كلمة ام شوشو صاحبتي كل اما تشوف خلقت اهلى ...قصدها ايه الوليه دي ؟؟

أرتاح العريان من تعب الغسيل .... كلمة امي لما نزلت على موبيلي بالشكوش مما ادي لتحوله الي حتة بتاعة بعد ما شافت مرة فاتورة مكلماتي وبعد ما تاكدت في مرة اخري انو مصدر ازعاجها و صحيانها من احلاها نومة وللفقيد الرحمة ولنا السلوان على الخسارة الفادحة

اللي ما عنده مرا حاله زي الخر-..........كلمة ام سميرجارتنا لسمير من ساعت ما اتهبل وبقا بيجري ورا قطط الشارع كنتيجة طبيعية لأعلانات ميلودي وبوبي اللي شردت الملل وجرستة وطلعت البلا على جتته وجتت الي شاف الاعلان

تعملى ايه يا خايبة بحبالك الدايبة.......كلمة مهندسة زميلة في ميعاد القبض عند اكتشاف الصدمة المتمثلة فالثبات الوضيع للمرتب مع التغير المبهر والمستمر للاسعار

وأسمع سلام سنة جديدة تجيب بواسير ....وحسبي الله ونعم الوكيل
---------------------------

معلش يا حج ربنا يباركلك ويخاليهملك حقوق النشر محفوظة للمقيحة صاحبت البلوج والمطرح عشان اسمالله على مقامكو شفت بوستاتي ومصايبي نازلة في جرايد ومنتديات بأسامي مخلوقات تانية ..متشكرين و تقعدلك في عينك وعفيتك

قضيه ادااااااااب

قاعده لا بيا و لا عليه و جالي تليفون من الواد فتحي ابن خالتشي والي ميعرفش فتحي فهوا واد عامل نفسو راجل ومعلش خدو بالكو من عامل نفسو دي... المهم الواد كالمني

فتحي ابن خالتشي : الحقيني يا ميمويا بنت خالتشي واحد صاحبي اخد مفتاح الشقه بتاعت الشيخ زايد( هما عندهم مخزن في الشيخ زايد بيشيلو فيه الكراكيب) وجاب فيها بنت والجيران وادتو على القسم وده صاحبي ولازم اخرجو وونبي يا ميمو توصليني لحد قسم الشيخ زايد

وقد كان وصلنا لقينا القسم كلو بيضرب في الواد صاحبه والبت اللي معاه متبهدله على الاخر ... انا قلت مش هادخل بس ان جيتو للحق انا خفت قلت اخد الواد اروحو لامه واكسب في البت ثواب وده ودي عيال جامعه امريكيه واخرهم هيقعدو يعيطو واصلي باروح افلام عادل امام وعارفه اللي فيها

دخلت القسم ولسه بقول للظابط

ميمو:ممكن حضرتك تندهلي الناس الي جوه بس عشان امشي ويا ريت كوبايه ميه

مطلعشي ظابط طلع عقيد طن طن طااااااااااااااان مبدئياً راح منولني بالبوكس في خلقتي وهبدني شلوت في بطني

ميمو: ليه كده بس انا عملتلك حاجه يا عم انت

العقيد طارق: انتي يا بت انتي ازاي تردي عليا وتقوليلي ممكن كوبايه ميه مش كفايه انك جايه تطلعي عيال وسخه يا بنت المت....يا ...انت يا ابني اعملها قضيه انها كانت مع العيال دي في الشقه

ميمو: يا نهار اسود انت هتتبلا عليا داحنا ناس محترمه ومهندسين وقريبه وزير وبسال عالواد ابن خالتشي عشان اتاخر

راح طالع علينا بالجزمه والبوكس والشلاليت والالكام واللزي منه واديلو ادي .. كنت لسه هفرتكو وافعصو بصيت لقين نفسي اغمي عليا.. فلت من ايدييييييي ...فقنا لقينا نفسنا ملقحين على البورش نشفو دمنا شويه ودخلونا للمامور

المامور : معاكي بطاقه

ميمو: في العربيه يا فندم ..ممكن كوبايه ميه ؟؟؟

المامور : ليه قالتي قدبك علي سياده العقيد طارق ؟

ميمو: حضرتك مش شايف اللكميه الي في وشي ودراعي المكسور... وهوا انا لحقت اساسا

المامور:انتي ايه الي جابك؟؟

ميمو: الواد ابن الجزمه ده عشان فافي وكان عايز يطلع صاحبه

المامور:انتي كنتي هاتلبسي اداب

ميمو: يا باشا الواد يجي 17 سنه اخره يعني كتر خير الدنيا انه بيروح الحمام لوحده

المامور :طيب انزلي امضي على المحضر واتفضلي اعتزري لسياده العقيد طارق

ميمو: حسبي الله و نعم الوكيلللللللللللللللللللللللللللللللل

فتحي ابن خالتشي: انتي ايه الي دخلك معايا القسم ؟؟

ميمو : والله عال نضرب ونسمع شتايم عنب عشان ابو شخه مبيعرفش يتصرف لوحده وخايف من امه ويا ريته تمر في اهلك

اه نسيت اقلكو طبعا العقيد كان ملفقلي تهمه وعشان يسبكها ويلبسهالي ويبوظ سمعتشي ويدمر مستقبلي قال اني ماشيه من غير بطاقه فلما مضيت على المحضر كتبت نفسي مروه السيد احمد عبد ربو و اقطن بدير النحاس رقم 7

---------------------------------------

تحذير: لكل من يسكن في الشيخ زايد العقيد طارق ده في قسم الشيخ زايد ومابيعرفش يتكلم ده بيرفص بس

يقطع التعليم وسنينة

جامعة حكومية

طالب جامعه محليه مضروب بالنار بيجي من اربعه الفجر عشان يقعدلي قدام تقديره دخله كمبيوتر وهوا ولا عمره شاف كمبيوتر ولا هايشوف اساسا و مقتنع اقتناع تام انو هاينجح في الكمبيوتر نظري – يتكون الكمبيوتر من فاره ولوحه مفاتيح و
الطالب :المودم ده اللي بيوصلنا بالانترنت ؟
ميمو: ايوه
الطالب :الكمبيوتر ده الي بيوصلنا بالانترنت؟
ميمو:ايووووووه
الطالب : التليفون ده بيوصلنا بالانترنت ؟
ميمو:ايووووووووووه
الطالب:على فكره انتي بتدينا معلومات متناقضه وهشتكيكي لدكتور الماده

الخلاصه : قف للمعلم ولاعبه صلح .... اديلوعلى افاه وممكن تقبح

كمبيوتر ايه ومودم ايه هوه لاقي ياكل ... ابقا ادخله السكشن بسندوتش حلاوه بالقشطه وقزازه صاروخ وهيبقا زي الفل ...ده لو شاف دكتور الماده يعملها على روحو

جامعة خاصة

طالب في جامعه خاصه من الي بيدفعو مرتبي لمده تمانين سنه قدام .. عشان ياخد شهاده هز طوله واتخانق مع البت صحبته عشان يحضرها اخر سكشن مراجعه قبل الامتحان - شوفتو الواد خايف على مستقبلها ازاي

ميمو: يا جماعه حد يعبرني ويجاوب اي سوال ... طب حد يعرف انا بدرس ايه اساساً ؟
الطالب : اجاوب انا ؟؟
ميمو: ايوه يا ابني ربنا يسعدك
الطالب:حاجه ليها علاقه بالكمبيوتر
ميمو:برافوووووووووو
الطالب: برافو حاف كدا؟؟ مفيش حاجه تطريها؟؟؟
ميمو: طب ممكن تشيل ايدك من على زميلتك عشان ده سكشن مش شقه مفروشه

الطالب: انتي بس تلاقيكي غيرانه؟

الخلاصة: قف للمعلم واديلو بوسه ...... اصل المعلم بيفهم جاموسه

بلا تعليم بلا نيله بقا دي عيال عايزه تتربا من اول وجديد ... لولا انها سبوبه كان بقا ليا كلام تاني

عزيزي خليفه...تحيه طيبه وبعد

راجعين من الاستفتاء انا والعيال بتوع الاداره الهندسيه تقولوش كنا بنفتح مكه ولسه هانتفرج على فيلم كارتون في المكتب عندي ربنا ما يقطعلنا عاده وطب علينا ابن المؤذية

كالعاده دينا تبولت لا اراديا وشريف عمل نفسه بيكلم امه في الموبيل وريهام سورقت وهشام قعد يتهته ويتفتف وياسمين جريت ويامن قعد يلعب في منخيره وانا حاولت ابرر الجريمه الي احنا عاملينها دي ومعرفتش فاتخصملي يومين .....طيب احاول اهدي الجو ازاي ؟؟ازاي ؟؟ احنا هنبعت نجيب فطار لما اسالوه كدا يمكن يحب يطفح معانا
ميمو:حضرتك احنا هنبعت نج..ب

المدير : اللي عاوز يطلب مني حاجه يبعتلي جواب مكتوب على ورق أبيض بصيغه رسمي انا مش شغال عند اللي خالفوكو ..كل اما تشوفو خلقتي تسالوني على حاجه .......طرااااااااااااااااخ - ده باب الاوضه بتاعتو.....رقيق وزوق وحساس بطريقه ....امري لله نكتب خطاب رسمي

السيد / مدير الاداره الهندسيه بالمصلحه
السلام عليكم ورحمه الله وبركاته .........تحيه طيبه وبعد

عزيزي خليفه
بعد السلام وجزيل الشكر ....بعتنا نجيب طعميه سخنه من الشبراوي نجبلك معانا ولا هتاكل لوحدك زي كل يوم؟؟؟؟
مع اطيب تمنيات العاميلن بالمصلحه وفائق الاحترام والتقدير
امضاء
الهفتانين انتطار للطعميه
ملحوظه :السؤال لغير الله مزله ولو مش عايز ان شالله عنك ما طفحت...... هنطلب احنا

اطبع ...وحط الجواب في ظرف عليه ختم النسر...وملحسه للسكرتيره تدخل الجواب بسرعه....ودخلت بالظرف .لحظه صمت .... باب القوضه يفتح في عصبيه وراس المدير طالعه
المدير : ياا نيلـــــــــــــــــــه دخليليييي المتخــــــــلف الي بعت الجواب ده
ميمو: برستيجي يا ناس مش معقول كدا